A vida nocturna das árbores

Para a proposta de traballo sobre soporte téxtil do terceiro trimestre do grupo de Iniciación, Esther fixo unhas bolsas baseadas no libro " La vida nocturna de los árboles", un libro único, serigrafiado a man por expertos artesáns da India :

Exercicios en papel e téxtil de Esther Arjona López . Grupo de Iniciación.

Datos do libro :

Título: "La vida nocturna de los árboles"
Autores: Shyam / Durga Bai / Urveti
Editorial en España: Faktoría K de Libros
ISBN: 978-84-96957-83-1

No blog da editorial Kalandraka teñen un post adicado a este máxico libro: 

Na colección de Arte de FAKTORÍA K hai un recuncho destacado para libros selectos, únicos, especiais. Libros producidos coa adicación, a delicadeza e a intensidade da alma, non exentos dun considerable esforzo físico. Libros manipulados por expertos artesáns e chegados do lonxano Oriente, como os Magos que lle poñen o broche de ouro ao non menos máxico tempo do Nadal. Coa edición limitada e numerada de “Animalario, arte de la India”, FAKTORÍA K tendía unha ponte cultural con Tara Books. A esa obra súmase agora “La vida nocturna de los árboles”, na que Arumugam -Míster A para os amigos- e o seu equipo de impresores, obsequian os lectores cun traballo de calidade impecable.
Neste 2011, Ano Internacional dos Bosques, “La vida nocturna de los árboles”, galardoado co Premio Novos Horizontes na Feira Internacional do Libro de Boloña (2008), proponnos un achegamento á mitoloxía e mais á natureza.

Distintas visións das árbores, representadas mediante intrincados debuxos, enchen as páxinas deste marabilloso libro de arte da tribu Gond, afincada no centro da India. Como habitantes tradicionais dos bosques, os Gond cren que as árbores son o eixe da vida: durante o día, realizan un arduo traballo proporcionando sombra, acubillo e alimento. Pero pola noite, cando os visitantes diurnos marchan, os seus espíritos luminosos revélanse en todo o seu esplendor. Para esta comunidade, os aspectos práctico, estético e espiritual da natureza son facetas inseparables.

A partir desta lenda hindú, este libro especial contén 16 
 representacións de árbores sagradas: figuras abigarradas, de trazos precisos e detallistas, figuras de animais que se camuflan no conxunto, chamativos contrastes cromáticos… En “La vida nocturna de los árboles”, as imaxes acompáñanse de textos poéticos ou mitolóxicos que invitan a coñecer o rico e valioso imaxinario desta tribo.
Esta homenaxe á natureza, impresa con tinta feita á man sobre papel negro, é obra dos tres pintores contemporáneos máis prestixiosos da familia Gond. Pertencen á mesma tradición, comparten o mesmo universo mítico e idéntico concepto da arte popular, pero cada un caracterízase por un estilo propio e unha personalidade creativa particular. Bhajju Shyam, un dos artistas máis afamados da tribo Gond, destaca polos seus coidados e intensos óleos. A súa obra, cada día máis recoñecida internacionalmente, expúxose nas principais salas de arte da India e de Europa. Durga Bai é unha artista nova que constantemente reelabora e reinterpreta a arte Gond ata rebasar os seus límites, creando obras de gran forza. Ram Singh Urveti é un brillante creador a quen moitos outros pintores Gond respectan pola súa técnica delicada, depurada e sofisticada. O seu traballo recrea un mundo de fantasía e metamorfose, que cobra vida cos seus detalles de formas vivintes.
Cada páxina de “La vida nocturna de los árboles” é unha obra de arte única, cos seus propios matices e peculiaridades. Mr. A dirixe actualmente un grupo de 16 impresores e nos últimos anos contribuiu á produción de máis de 180.000 libros manufacturados, o que equivale a máis de 11 millóns de aplicacións de tinta. Traballan e viven en Chennai, como nunha comuna. E a culminación de cada proxecto de impresión celébrana de forma festiva, compartindo unha comida especial de confraternidade.

No seguinte video podedes apreciar todo o proceso deste libro feito a man :